भारतलाई पराजित गर्दै नेपाल २३ वर्षपछि दक्षिण एसियाली खेलकुद (साग) फुटबलको च्याम्पियन भएको छ । करिव १ महिना अघि बंगबन्धु कप जिताएको टोलीले गत सोमबार भारतको गुवाहाटीस्थित इन्दिरा गान्धी रंगशालामा आफ्नै मैदानमा भारतीय खेलाडीहरुलाई २–१ ले हराउँदै नेपाली टिमले उपाधि उचाल्दा नेपालीहरुको शीर गौरवले उचो भयो । नेपालीहरु सडकमा निस्किएर नेपालको जितको उत्सव मनाए ।
नाकाबन्दी गरिरहेको भारतलाई पराजित गरोस् भन्ने नेपाली मानसिकता र सामरिकरुपमा निक्कै चासोका साथ हेरिएको खेलमा भारतलाई हराउँदा सबै नेपालीहरुलाई खुसी लागेको छ । यो जित दिलाउनका लागि प्रमुख भूमिका खेलेका मध्ये एक साग फुटवल टिमका कप्तान विराज महर्जनलाई हामीले सोंध्यौं “खेल्न लाग्दा नाकाबन्दी सम्झनु भयो कि भएन ?” कप्तान विराज महर्जनसँग नेपाली हेडलाइन्सका सरोज गौतम र अशोक महर्जनले गरेको अन्तरंग कुराकानीः
Biraj Maharjan Interview (2)विराज महर्जन, कप्तान,राष्ट्रिय फुटबल टिम
नाकाबन्दी लगाउने भारतको टिमलाई हराउँदा कस्तो अनुभव भयो ?
–यो जितमा हामी मात्र होइन सिंगो देशले नै खुसी मनायो । भारतको नाकाबन्दीका कारण देश कठिन परिस्थितिमा गुज्रिरहेको बेला नै हामीले भारतसँग प्रतिस्पर्धा गरिरहेका थियौं । नेपालीहरुको एक मात्र चाहना थियो–यस पटक जसरी पनि इन्डियालाई हराउनु पर्छ, यसले मात्र हामी खुसी र सुखी हुनेछौं । भारतलाई हराएपछि हामी जितको खुसीले पागल भयौं । त्यो खुसी कसरी व्यक्त गरौं …हामीले देशको सपना पुरा गर्यौं । नेपालीहरुको सपना साकार पार्यौं जस्तो लाग्छ ।
यो सफलतालाई कसरी लिनु भएको छ ?
–हामीले खेल्यौं । तर नेपालमा बसेर देशवासीले गरेको माया नै हाम्रो ठूलो सम्पत्ति हो । केटाहरुले खेले । गोर्खेहरुले खले भनेर जसरी आज चर्चा परिचर्चा भइरहेको छ हामी यसबाट निकै खुसी छौं । यो खुसी हामी सबै देशवासीसँग साट्न चाहन्छौ । हामी भुकम्पमा परी ज्यान गुमाएका परिवारहरुसंग पनि यो खुसी साटन चाहन्छौं । यो जित उहाँहरुमा नै समर्पण गर्न चाहन्छौं ।
सामाजिक सञ्जालमा चर्चा भए जस्तो खेल्ने बेला देशमाथि लागेको नाकाबन्दी सम्झनु भयो कि भएन ?
–सारा नेपालीले भोगको समस्याबाट हामी खेडालीहरु पनि अछुतो रहने कुरा भएन । भुकम्पले ठूलो पीडासंगै भारतले पनि अर्को पीडा थोपर्ने काम गर्यो । त्यसकारण हामीले नाकाबन्दी सम्झिएर खेल्यौं । यो सिंगो नेपाल र नेपालीको जित हो । जसले हामीलाई हौसला दिनु भो, जसले हामीलाई माया दिनु भो, जसले हामीलाई खेल्नको लागि उर्जा प्रदान गर्नु भो, जित पछि हामीले पाएको माया सम्झँदा निकै ठूलो काम गरेको जस्तो लाग्यो ।
भारतलाई हराउने धेरै बर्ष अघिदेखिको सपना साकार भयो होइन त ?
हाम्रो टिमले राम्रो गर्न सक्यो । जसको कारणले हाम्रो र सबै नेपालीको सपना साकार भएको छ । नेपालमा आउँदा अभिन्दन गर्नु भो । हामो जीवनमा यो भन्दा ठूलो सफलता अरु केही हुनै सक्दैन । फुटबललाई मात्र होइन सबै खेललाई माग गरिदिन म आग्रह गर्न चाहन्छु । खेलाडीस्तै राजनीतिक दलमा पनि यस्तो टिमवर्कको भावना भैदिएको भए कस्तो हुन्थ्यो जस्तो लाग्छ ।
भारत हाम्रो सबै भन्दा नजिकको छिमेकी हो तर किन साइकोलोजिक प्रेसर हुन्छ ?
–अन्य देशका टिमसंग खेल्दा हामीलाई फ्रेण्ड्ली रेस्पोन्स हुन्छ । तर भारतीय टिमले हामीलाई खासै रेस्पोन्स गर्दैन । अरु देशका खेलाडी राम्रोसंग घुलमिल हुन्छन् । तर इन्डियाका साथीहरु बोल्दैनन् । सामाजिक सञ्जालमा आउने कुराले पनि हामी सपोर्ट पनि हन्छ र सँगै प्रेसर पनि पैदा हुन्छ ।
यस पटकको जितमा महत्वपूर्ण भूमिका कसको रह्यो ?
–यो सिंगो टिमको जित हो । सबैको मेहनतले जित सम्भव भएको हो । एकले मात्र गरेर सफलता प्राप्त गरेको होइन । सबैले मेहनत गरेका छन् । ग्राउण्डभित्र देशको इज्जत राख्न र देशको नाम उचाइमा पुर्याउन सबैले सक्दो खेले । जित्नको लागि एकले अर्कोलाई हेल्प गर्ने भावना हाम्रो निकै राम्रो थियो । हाम्रो प्रशिक्षक राजु साक्य सरको मोटिभेसन पनि सबैभन्दा उत्कृष्ठ कारण हो भन्ने जस्तो लाग्छ ।
राष्ट्रिय टिममा के कुराको अभाव छ जस्तो लाग्छ ?
–पहिला भन्दा धेरै कुरा राम्रो भएको छ । डिफेन्समा केही सुधार आएको छ । स्कोरिङमा निक्कै राम्रो भएको छ । तर मिडफिल्डमा प्रोब्लम छ । यस पटक भाग्यले पनि साथ दियो । यसलाई प्राफेसनल भन्न मिल्दैन । यसलाई सुधार गरेर बलियो टिम बनाउनुपर्छ ।
म्याच फिक्सिङ गरेपनि फुटबल टिमले देशलाई खुसी दिएको छ फुटबलको भविष्य कस्तो देख्न हुन्छ ?
–भविष्य सुरक्षित छ म भन्दिन । पहिला घर परिवार छोडेर जाँदा केही हुन्छ जस्तो लागेको हुन्छ । दुःख लाग्दो कुरा सरकारबाट हामीले केही पनि पाएका छैनौं । एन्फाबाट केही मात्रामा सहयोग त भएको छ, प्लेट फर्म दिनुभएको छ । आफूले पनि ठूलो मेहनत गर्नुपर्छ । खेलाडीहरु भविष्यमा के गर्ने भन्ने सुनिश्चिता अनुभव गर्दैनन् । हरेक खेलमा सफलता हाल नलाग्न पनि सक्छ तर सफलता निश्चित छ । यसको लागि लगानी र मेहनत दुवै चाहिन्छ ।
Biraj Maharjan Interview (3)
के गर्यो भने फुटबल खेलाडीहरुको भविष्य सुरक्षित गर्न सकिन्छ ?
सरकार र एन्फाले दीर्घकालीन रुपमा खेलाडीहरुको सेवा सुविधामा ध्यान दिने गरी नीति निर्माण गर्नुपर्छ । अहिलेसम्म गेम सुरु हुनु भन्दा अघि मात्र सुविधा पाएका छौं। यसरी हुँदैन । सधैभरी तयारी गर्नको लागि हामी तम्तयार रहनु पर्ने हुन्छ । गेम हुदा मात्र होइन अघिपछि पनि खेलाडीहरुलाई प्रत्साहन हुने गरी व्यवस्थापन गर्नुपर्छ ।
ठ्याक्कै भन्दा कसरी सुधार गर्न सकिन्छ कप्तानकोरुपमा तपाईको के सुझाव छ ?
–राम्रो ट्रनिङ दिनुपर्छ । अहिलेदेखि नै प्राक्टिस गराउनु पर्छ । एन्फाले पोलिसी बनाउनु पर्छ । सेड्युल अनुसार काम गर्नुपर्छ । जति बेसी खेल्यो त्यति नै बढी सफलता प्राप्त गर्ने हो । राम्रो खेडालीहरुको छनोट गरेर ट्रेनिङ दिनुपर्छ ।
ब्यक्तिगत कुरा गरौं तपाईको विवाह भएको छ कि छैन ?
–छैन, गर्लफ्रेन्ड छ ।
केटी फ्यानहरुले प्रेम प्रस्ताव राख्दैनन् ?
–आफ्नै गर्लफ्रेण्ड छ । सात बर्ष भयो । धेरै दिदीबहिनीहरु छन् । सपोर्ट गर्ने र माया गर्ने धेरै दिदीबहिनी र साथीहरु छन् । कतिपयले त्यस्तो गर्न खोज्नु हुन्छ तर म सम्झाउँछु । साथीहरु क्लोज छन् तर म त्यस्तोबाट टाढै बस्छु।
Biraj Maharjan Interview (4)
नेपालका राजनीतिक दलहरुलाई तपाईको के सुझाव छ ?
राजनीति भनेको मुल कुरा हो । राजनीतिले गरे मात्र जे पनि सम्भव हुन्छ । हामीले कहिल्यै जातको कुरा गरेनौं । हाम्रो टिममा सबै जातजातिको सहभागीता छ । यो सफलता टिमकै कारण सम्भव भएको हो । देशलाई जिताउन कसरी मेहनत गर्यो राजनीतिक दलका नेताहरुले गम्भीर भएर सोच्नु पर्छ । अग्रज नेताहरुले एकले अर्काको खुट्टा तान्ने भन्दा पनि कसरी देशको विकास हुन्छ भनेर सोच्नु पर्यो । जनताले कसरी सुख पाउछन् ? जनता र देशको हित हुने गरी काम गर्नु पर्यो । फुटबलजस्तै मिलेर लागे देशको विकास हुन्छ भन्ने लाग्छ । यही नै सुझाव छ कि खुट्टा तान्ने होइन एक अर्कालाई सघाएर देश विकाशमा लाग्नुस् ।
