Panahon sa tinuig nga mga okasyon ug selebrasyon ulog-ulogan lang ang mga mamumuo sa mga kapitalista ug mga burukrata. Nindot kaayong paminawon ang ilang makapalanay-sa-atay nga mga pulong sama sa “bayani sa modernong panahon” ilabina niadtong pagkamatay ni Flor Contemplacion. Apan tan-awa ang realidad.
Si Emil, disiotso anyos, nagtrabaho isip attendant sa estasyonan sa gasolina. Gisweldohan siya og P130 sa walo ka oras nga pagtrabaho, apan usahay, kun patrabahoon og duha o kapin pa ka mga oras, dili na siya bayaran sa obertaym. Kun mobalibad siya pagtrabaho, daghan kaayong mga batan-on gikan sa kanait lang nga squatter area ang mag-ilogay pagpuli sa iyang trabaho. Girekluta siya sa usa ka ahensya sa pangimpleyo, kinsa mopaksi usab og 5% sa iyang sweldo.
Sa 11 ka mga opisyal nga holiday matag tuig, si Emil wala gyod makadawat og holiday pay kay inadlaw man ang iyang suhol. Wala siyay gitagamtam nga sick leave o vacation leave nga mga benepisyo ug wala gani bayari og 13th month pay (christmas bonus nga katugbang sa usa ka bulang pagtrabaho).
Si Emil patrabahoon lang sulod sa lima ka bulan aron dili siya mahimong usa ka regular nga empleyado, usa ka iskemang gidesinyo sa iyang amo aron makalikay sa mga balayranan.
Si Trining nagtrabaho sa usa ka gamayng tindahan nga may 20 ka mga empleyado. Bayente-tres anyos na siya ug minyo na ug sama kang Emil, nagtrabaho nga sobra na kaayo sa oras tugbang sa gamay lang kaayong bayad. Makasapi siya og P150 sa siyam ka oras nga pagtrabaho matag adlaw. Apan lahi kang Emil kinsa duol lang kaayo ang gipuy-an sa iyang gitrabahoan, si Trining manakayan pa sulod sa 1-2 ka oras sa usa lang ka agi. Ang iyang plite mogasto na og P45 ida-bwelta lakip na ang plitehan sa MRT(Manila Railway Transit).
