YANONG BOGOHANON
nga ang Korte Suprema nilusad sa kataposang hukom sa kahimoan nga syudad
sa Bogo. Nahadlok baya ko nga ang Taas nga Hukmanan sa nasod nahimo nang usa ka bata ang kabuot nga kon kinsa ang mokablit ug mohunghong manalinghog nga magbalit-ad sa nahauna niyang hukom. Salamat na lang nga sa kataposan gipanultolan sa unsay ikaayo sa mga Bogohanon.
Sa dili magdugay mahuman ra ang matahom ug hamugaway nga City Hall nga magsilong sa nagkadaiyang mga buhatan sa usa ka tigbayon. Wala tingaliy Bogohanon nga dili mobatig garbo nga makalantaw sa highway sa bag-o niyang City Hall. Di lang mobati tag garbo, ikalipay sa mga Bogohanon nga ang Bogo usa ka tinuod nga dakong kahoy nga nagtubo ug nilipang sa pagdis-og sa katuigan.
Apan unsa kining garbo ug kalipay ta sa bag-o tang dakbayan? Ang garbo kay anaa sa imong syudad ang butang nga nahimong katumanan sa kusog ug paningkamot sa mga anak nga pinili sa mga Bogohanon? Ug ang kalipay kay ikapanugilon ta ang makita sa mata ni kinsa man nga mangusisa sa lungsod nga sa kataposan nahimong usa ka dakbayan? Mao na ba lang kana ang garbo ug kalipay ta? Ikaw sa imong pagka Bogohanon unsay ikatampo sa kalamboan sa imong dakbayan?
Ayaw ko sultihi nga wala kay mahimong ikatampo sanglit usa man lang ka yanong Bogohanon. Walay patigayon ug dili kawani sa publiko kun pribadong buhatan. Sa laktod nga pagkasulti managsama sa tagsulat nga nabuhi lang sa palagnas apan dili hinigtan. Ayaw ko patuhoa nga wala ta. Dili lang gingbuhaton sa mga pinili sa lungsod nga mapalamabo ang dakbayan. Dili lang sa mga magpapatigayon, sa mga kawani sa kagamhanan ug mga pribadong buhatan ang pagtambayayong nga mapalambo ang dakbayan. Ang usag-usa may iya-iyang gingbuhaton nga makatampo sa ikaayo sa iyang dakbayan. Natan-aw ko nga makatabang ang imong kamahunahunaon.
next....
